邊個話九十後無正職就係廢青?
宜家香港嘅九十後似乎唔多興做正職，淨係鍾意襟手機同上網，但又係咪真係大家諗嘅咁樣，唔返工就係廢青呢?
如果以為佢地成日玩手機、埋頭上網無世藝，咁就錯啦，因為佢地分分鐘係網絡紅人而你竟然唔知啫。家陣唔少網絡紅人都可以搵到真銀，事關呢一代嘅搵銀方程式已經好唔同，一於搵90後人氣網絡紅人譚淇淇Kiki做人版，睇下佢地點樣成功出位。
Kiki身份多多，Model、主持、Rapper和炸雞店老闆等，百觸咁多爪，但無一份係朝九晚五嘅工，唔係長散就係老闆，然而佢搵嘅錢分分鐘多過你同我。
敢拍片，上載呃LIKE
出道時嘅身份係Rapper，呢個身份喺香港嚟港很少見，傳媒形容佢係第一位Rapper出道嘅女生。佢嘅出道前傳，是私家唱作左一首歌放上網，仲係一人包辦作曲作詞主唱同拍埋，之後就中咗Andy Warhol嘅金句：「每個人都可以紅15分鐘」，據講當時點擊率有近十多萬，雖然搵唔返最初條片嚟引證，但就確實吸引左MC Jin（Rapper歐陽靖）收佢做首位女徒弟，成功為踏出樂壇鋪路。
題外話，討論區有巴打毫不留情話寧原睇佢個人多過聽佢嘅歌喎，唔知大家睇完條片又點諗。
敢埋站，埋個好站
Kiki嘅紅人路徑，轉捩點係一個「o趙」字! 佢2014年做咗毛記電視偽員主播「o趙海珠」而人氣急升。「o趙海珠」雖然好似好無厘頭，但KIKI每次都好認真咁同腦細林日曦開會度計。雖然佢好快就離開左毛記，但早前「毛記電視」《分獎典禮》掀起全城熱話，作為元老級偽員「o趙海珠」嘅佢，都到場在台下撐下，打破佢同腦細林日曦嘅不和傳聞。
敢投資，你就係老闆
咁唔做「o趙海珠」又可以做啲乜呢？KIKI都有好多瓣野做，唱歌、拍廣告、拍電影、拍網劇，啲Job愈接愈多，趁住曝光率有升無減呢個時機，同父母投資６位數字在佐敦開左間韓式炸雞店HARU HARU。有巴打女神喺度幫手執枱架喎，當然吸引唔少人到，半年就開埋分店添，可以話係好識吸金嘅食腦女神。
(壹週Plus截圖)
敢癲喪，搞笑更出位
食腦嘅女神最厲害係唔介意醜化自己，騎騎呢呢嘅生鬼形象令巴打同絲打都嬲佢唔落，90後嘅KiKi亦好識經營社交網站，不時喺社交網上更新動態，SHARE自己嘅搞笑短片，顯露佢癲喪盞鬼嘅性格，一時喺條街扭嚟扭去跳舞，一時又勁麻甩咁食雞，完全將形象拋諸腦後，有巴打封佢做傻更更女神！
敢性感，玩出驚喜
不過傻更更女神都有性感一面，早前佢幫一間激光脫毛公司拍廣告，第一次用咁性感斯文正經的形象，仲大show皮膚白滑嘅手臂同長腿，好多粉絲都大讚傻女神變咗索爆女神，驚喜度滿分。
呢次係咪THE BEST OF Kiki? 自己睇自己諗啦!
KiKi家下主力打理韓式炸雞店，半年開左兩間舖啦，希望炸雞店可以快啲上軌道，賺到錢就買間大屋，要有多幾間房，方便同家人同住喎，完全好知自己做緊乜同想做乜，而譚淇淇只係其中一個努力的九十後，又點會係廢青。
KiKi的多多範數，包括：
903電台飾演網上自創角色「HOLD住妹」
自家唱作影片在網上點擊率近十多萬而紅，被歐陽靖MC JIN收做女徒弟，上埋紅館做MC JIN個唱嘉賓
簽張敬軒開嘅模特兒公司，拍過唔少平面及電視廣告，包括港鐵、百老匯電器、海洋公園、八達通、太興
在Medilase激光脫毛公司廣告上扭轉搞鬼形象，斯文性感Look得到粉絲大讚
拍過電影驚慄片《迷離夜‧奇幻夜》，仲係擔正做主角，被封為「小法拉」
同家人開韓式炸雞店HARU HARU，已有兩間分店
做咗毛記電視主播「o趙海珠」和偽員「奸姐」
以「香港首位女Rapper」之名出道，進軍HIP HOP界